ASKARI WA JWTZ WAUAWA DARFUL NCHINI SUDANI.

Askari saba wa kikosi cha kulinda amani cha Umoja wa Mataifa na Umoja wa Afrika wameuawa katika shambulizi la kuvizia huko Darfur, magharibi mwa Sudan.
Tukio hilo la Jumamosi limetajwa kuwa baya zaidi katika historia ya miaka mitano ya kikosi hicho cha Umoja wa Mataifa na Umoja wa Afrika kijulikanacho kama UNAMID.
Kaimu Msemaji wa UNAMID Christopher Cycmanic amesema hujuma hiyo ilIjiri katika kituo cha walinda amani cha Manawashi kaskazini mwa Nyala mji mkuu wa jimbo la Darfur Kusini. Ameongeza kuwa askari wa UNAMID walishambuliwa na kundi la watu wenye silaha ambao hawakuweza kutambulika wakati huo.
UNAMID haijatangaza uraia wa maafisa waliouawa lakini wanaosimamia amani katika eneo hilo ni askari kutoka Tanzania. Kati ya waliopoteza maisha ni wanawake wawili wanaohudumu kama polisi wa kulinda amani.
Katibu Mkuu wa Umoja wa Mataifa Ban ki-Moon amelaani vikali shambulizi hilo dhidi ya UNAMID.
Ametoa wito kwa serikali ya Sudan kuchukua hatua za haraka kuwakamata na kuwachukulia hatua za kisheria wahusika. Mji wa Nyala ambao ndio mkubwa zaidi katika eneo la Darfur umekumbwa na tatizo la ukosefu wa usalama katika siku za hivi karibuni.